香港新浪網 MySinaBlog
« 上一篇 | 下一篇 »
| 10th Jan 2006, 13:54 | 獨樂樂眾樂 | (3175 Reads)

平均分: 5.00 | 評分人數: 2

看名曲滿天星,感覺像看鬧劇KARAOKE版。主持經已係笑話啦!嘉賓亦都好攪鬼。這個場口又點會少得觀眾的份兒呢?

 

 跑江湖幾十年的汪阿姐即使集集都著得花枝招展,儀態萬千,可是每回她一開腔唱曲,便聽得出是吊著嗓子迫自己唱。勉強拉高,竭力降key,唔夠氣去唱於是曲的中後段變成她個人「扯蝦暴現記」。。攪到成隻歌無哂靈魂,分明係嚇死。而電視機前食玻璃大的我目擊如斯景況,雞皮疙瘩起哂。真係好難聽!

 

當然,不得不佩服她仍勇敢地唱出她根本唱不到的歌。即使有些歌本來就是她本人的歌。這種豁出去的豁達,真係要「啤」一聲致敬。唱唔到就係唱唔到,她連說話也「扯哂蝦」,騙不到人啊,點解唔認老呢?

 

周啟生,拜託,不要把好好一首歌改到鬼五馬六,仲唱到不倫不類累埋隻歌。你此壯舉,真係唔識欣賞。

 

至於嘉賓,很多都未夠班唱。最慘情係,有些前輩「回哂塘」,仲要出來賣唱,太刻意。。你估真係大班人塞入房KARAOKE咩!黑色笑話咩?

 

剛過去的一集有胡杏兒當嘉賓,一樣好笑。她唱的是麗莎的《相思淚》。〔註:此Lisa可不是主持Lisa啊〕一開腔,就低開幾個key。究竟點解可以唱到隻歌咁沉咁死無哂mood?好不容易聽哂成隻變成「口水歌」的名曲之後,胡小姐竟對著Lisa自誇讀書時學過唱歌,仲要係女高音,五級耶。。妖!女高音就唔好把隻歌用低音來唱啦!頂!

 

有集的嘉賓伍小姐唱George Michael名曲《Last Christmas》也好笑到碌地。真係第一次見識有人唱歌,既要扮番鬼佬口音,又要咬字誇張,仲要邊唱邊擠眉弄眼賣弄「瘋」情。。哈哈哈!我媽仲煞有介事問我,她這樣唱係咪因為她有個著名的英文補習天王阿哥,所以不可咬字不準自拆招牌。。噓,咁深,我唔識答啊!

 

講到觀眾。。每次嘉賓唱緊歌,鏡頭都會故意掃一掃觀眾席捕捉觀眾們陶醉、期待和興奮的表情。。細心留意,我們會發現人家在台上唱歌,在台下雞啄唔斷說話的師奶阿嬸觀眾大有人在。。有咩咁好傾呢?有咩咁緊要必定立即分享交流呢?不是該專心靜靜聽歌嗎?究竟他們有幾重視那些名曲呢?

 

聽著朱咪咪唱《王昭君》,中氣十足,氣定神閑,手到拿來。。心想,如果無記豁達多點,朱咪咪絕對比汪阿姐更適合做《名曲》的主持。可惜,朱咪咪名氣不及汪阿姐,論資〔年資而非資質〕排輩也必然是汪阿姐在前頭。。所以,這只是我這個小觀眾的痴人說夢。哎唷!

 

反正胡胡鬧鬧又消磨了一晚,不如搵次請埋尹光上去唱《少理阿爸》啦!真係想幾funny有幾funny!爆收視之餘兼吸納年青一輩觀眾,歌詞內容啜核得來其實又好有教育意義,真的是相贏之局呀!大家一定睇得仲開心啦。。

 

〔唔附《少理阿爸》歌詞助興。哼!〕

 


[10] 朱咪咪唱得好

朱咪咪紅唔起原因不明,年輕時又索,又唱得,又鬼馬,晚晚走幾場,時下年青歌手難以相比,亞姐簡直無得比,


[引用] | 作者 ahmei | 13th Apr 2009 13:53 | [舉報垃圾留言]

[9] 蕉奸歎where磨

上周唔覺意一開始,聽到阿姐唱「蕉奸歎where磨」(酒干倘賣無),心諗,唔係啩,明知自己有幾多料,仲揀首超高難度的歌打頭炮,真佩服她的勇氣! 這與把一班「香港08」的球員,放在曼聯打正選,有乜分別?!


[引用] | 作者 gunners | 14th Jan 2006 15:12 | [舉報垃圾留言]

[8] 您們好!

Poo:您好!由《審死官》開始,我經已覺咪咪姐好正!要正經有正經,要癲喪有癲喪,絕對是一個世界女。。不,係世界姐。至於這裡的字體太細。。我攪唔掂,這裡的字有些變大了,有些自動縮小了。。我都唔知點攪番好。。
金婆婆:您好!先預祝您生日快樂。。呵呵~
Penny:其實節目真的每下愈況。。有點食之無味,棄之可惜之慨。
BMX:您好!em…我覺得阿姐連大戲都唱唔到。。
M_M:您好!我阿媽話,咪咪姐這種跑場歌手,閒閒地都有二百隻歌識唱用來跑江湖。。不過佢真係唱得好好。
小新:您好!多謝支持。
老貓:您好!多謝支持。


[引用] | 作者 | 13th Jan 2006 16:35 | [舉報垃圾留言]

[7] Chu Mimi

Wow, the fonts so small @_@.

 I always think Chu Mimi is a very good singer, both her vocal quality and her joking skills :)

 

 


[引用] | 作者 Poo | 13th Jan 2006 15:20 | [舉報垃圾留言]

[6]

我又係生日 : 年初四


[引用] | 作者 金婆婆 | 13th Jan 2006 15:01 | [舉報垃圾留言]

[5]

節目初期的製作令我很期待的, 每個星期都背負被朋友"老餅"、"痴線"或者"唔係嘛你" 的說話去聽這個節目,

去到中期估唔到連家人姥姥都不讓我聽只一句話" 都唔知佢地唱乜鬼野, 鬼五馬六..."隨即轉台看明珠台...(她又聽得懂嗎?)


[引用] | 作者 penny | 12th Jan 2006 10:43 | [舉報垃圾留言]

[4] 換人啦,好多人好過汪呀姐

好多人好過佢啦!如:肥肥、志偉...等。肥肥都唱得架,同個女一齊唱,得啦。志偉咁多朋友,有老有後生,是旦一個都夠照。

呀姐好,不過做戲囉....


[引用] | 作者 BMX | 12th Jan 2006 10:01 | [舉報垃圾留言]

[3] 朱咪咪勁正!

以前唔識咪咪姐會唱歌, 直至有次無記播煇黃演唱會(之類啦, 唔係好記得), 咪咪姐唱 '叉燒包' 唱到念急口令咁, 咬字又快又清楚, 又夠氣, 先知佢原來唱歌咁好聲.  最近亞記成日播埋啲實力派歌手演唱會, 咪咪姐永遠都係做嘉賓嗰隻, 無話自己 solo 既, 有啲可惜.  阿姐節目裏面唱 '王昭君' 真係兩個人咁, 同平時癲癲得得既佢有好大分別.  喺首歌裏面佢唱得好哀怨, 後段又好激昂, 真係要乜有乜.  咪咪姐好嘢!


[引用] | 作者 m_m | 11th Jan 2006 23:19 | [舉報垃圾留言]

[2] 有point!舉腳贊成

最初由鄭丹瑞主持都好好多,希望無線體察民意,唔好再比亞姐糟蹋了這些名曲,又令我們這些想捧場的觀眾都要熄電視.


[引用] | 作者 小新 | 11th Jan 2006 23:03 | [舉報垃圾留言]

[1] 講得好

我絕對贊成你的講法, 特別係汪亞姐扯蝦的情況, 簡直慘不忍暏.我覺得耳朵很難受. 和其他歌手簡直沒得比.


[引用] | 作者 老貓 | 11th Jan 2006 13:15 | [舉報垃圾留言]