香港新浪網 MySinaBlog
« 上一篇 | 下一篇 »
| 3rd Feb 2006, 13:39 | 貓事一籮籮 | (309 Reads)
年初五,收拾心情上班,父母也接著一早出門拜年去。。原本媽媽打算中午回家一趟餵餵大王,點知三缺一由配腳變主腳,分身不暇,玩足十個鐘。媽以為我一放工便即回家,而我亦以為媽下午回家妥置了大王。。晚七點幾,媽在電話中知我仍在公司,遂催促我快閃睇仔。
回到家八點三,漆黑一片,大王由聽到門匙聲開始怪叫亂喵一通。看看牠的兩只飯碗,放罐頭濕糧的和豆豆乾糧的都乾乾淨淨,我忍不住大笑。。
我:照哂鏡喎!
大王:喵嗚喵嗚喵。。〔直譯:餓死我喇!仲笑!快點啦!動作咁慢!〕
我:喂!都等我除低件suit,放低個袋,關上街門先啦!
大王:喵~〔直譯:餓死我喇!x N次〕
我:喂,唔使跟到咁實啦!我除低件外套咪開〔罐頭〕畀你食囉!
大王:喵~〔直譯:餓死我喇!x N次〕
我:一,一” 喂,我都未食飯啊!
大王:喵~〔直譯:餓死我喇!x N次〕
我:得啦得啦!
大王:喵~〔直譯:餓死我喇!x N次 + 快快快快快!〕
我:哈哈哈。。
我將早上剩下的1/2罐貓糧給牠。。狂風掃落葉,牠又嚷著再要。
大王:餓死我喇!餓死我喇!餓死我喇!餓死我喇!餓死我喇!餓死我喇!
〔件事係咁,同住咁耐,都知佢喵來喵去其實會明佢講緊什麼。。尤其是家中的這一員,非常健談。〕
我:得得得。。
於是,我開了第2罐,cut了1/3給牠。。
結果,因為佢囫圇吞棗式食得太急,於是當食到中段時。。卒之在廚房悉數連胃液嘔番哂出來。救命!搵著我來攪!
一,一”
之後,咪又繼續要吃囉。。吃飽了,就開始如常「四圍貢」,跑來跑去熱熱身踢踢波仔跳跳檯櫈培養情緒大便去。
一,一”
媽回來後,跟她嘻嘻哈哈研究阿奄尖仔幾點開始斷糧。。事關家中這奄尖仔,飽食終日卻挑食得緊要,唔肯食唔想食或放得太耐的食物,係索性用好粗暴的手法撥到成個廚房地七國咁亂,毫不妥協,採罷食兼不理睬大家以抗議膳食不合味直到我們屈服牠的精神抗爭為止。。
唔係又點會叫「大王」丫。。
哈哈哈。
我媽仲攪笑,問大王點解枕頭底有錢都唔去叫外賣食餐好的。。
〔事關我早幾天扮好人「過戶了」幾個有錢的紅封包畀佢過年,仲「收埋」在沙發上牠的私家睡枕下面。我細佬收到風,仲古惑地放多「一封利是」給大王,再嚷著話一場兄弟(我弟叫牠做「大佬」)要大家對分啊。。嘿嘿嘿!喂,利是錢是用來買貓糧喎!舉手勿動!〕
唔知家中有「小朋友」的朋友,有幾多人過年會整番封利是畀「小朋友」過年祝佢新一年精靈活潑健健康康呢?哈哈哈!

[2]

您好啊!囡囡幾時生啊?到時一定好忙喇!恭喜您先!


[引用] | 作者 | 5th Feb 2006 22:22 | [舉報垃圾留言]

[1]

我阿媽有!!由於我有2貓1狗,佢地三個都有,但我的「囡囡(貓)」有左,所以開了一個「基金」預備定d細嘅開支用來找數!!


[引用] | 作者 cats_dog | 5th Feb 2006 20:03 | [舉報垃圾留言]